Serbisyo Caravan 2025 Magbabalik sa Dubai, UAE Sa November

DUBAI, UAE—Maghanda na mga kabayan sa UAE dahil ngayong darating na buwan ng Nobyembre, magbabalik ang Serbisyo Caravan ng Department of Migrant Workers (DMW). Ito ang pahayag ni DMW Secretary Hans Leo Cacdac sa idinaos na town hall meeting sa Deira, Dubai, Sabado, 30 August 2025.

Dagdag ni Cacdac, kahit na hybrid na ang contract verification ngayon, may ibang serbisyo pa rin ang gobyerno na nangangailangan nang personal na pakikipag-ugnayan sa pamahalaan, katulad ng aplikasyon para sa National ID at libreng legal assistance.

Kinokonsidera na rin ng gobyerno na palawigin pa ang Serbisyo Caravan sa iba pang emirates sa UAE.

Nasa anim na libong overseas Filipinos ang napagsilbihan sa naganap na Serbisyo Caravan sa Dubai nitong Agosto, sa pagtutulungan ng DWM, Filipino Social Club sa Dubai, Overseas Workers Welfare Administration (OWWA), Philippine Statistics Authority (PSA), Pag-IBIG, Social Security System (SSS), Department of Social Welfare and Development (DSWD), Public Attorney’s Office (PAO), Department of Trade and Industry (DTI) at ng Philippine Consulate sa Dubai.