Lea Salonga Tatanggap ng Star sa Hollywood Walk of Fame

MANILA, PHILIPPINES —Gagawaran na ng sarili niyang Star sa Hollywood Walk of Fame ang Tony Award-winning Filipino singer at aktres na si Lea Salonga.

Mismong ang 54-year-old theater, film at concert artist ang nagbahagi ng balita sa kanyang social media page, bilang isa sa 2025-2026 honorees.

“Just now woke up to this bit of amazing news!!! To the Manila International Filmfest, many thanks for nominating me to be part of the class of 2025-26!” ayon kay Lea.

Kinumpirma ito ng Manila International Film Festival (MIFF), na nagsabing si Lea ang kauna-unahang Filipina na makakatanggap ng parangal sa ilalim ng kategorya ng 'Theater and Live Performance.'

"We’re incredibly proud to share that the Manila International Film Festival had the honor of nominating the one and only Lea Salonga for a star on the Hollywood Walk of Fame—and she’s officially been selected!” ayon sa MIFF.

Si Lea ang ikaapat na Filipino na Hollywood Walk of Fame honoree, na kinabibilangan nina Rob Schneider, Bruno Mars at Apl.de.Ap.

Nakilala si Lea bilang Kim sa Broadway Musicale na 'Miss Saigon,' at ibang pagtatanghal tulad ng 'Les Misérables,' 'Flower Drum Song,' at 'Old Friends.'

Siya rin ang tinig ng Disney princesses na sina Jasmine sa 'Aladdin' at Mulan.

Kasama ni Lea sa mahabang listahan ng 2025-2026 Walk of Fame class honorees, sa ilalim ng iba't ibang kategorya, sina Miley Cyrus, Josh Groban, Timothee Chalamet, Air Supply, Demi Moore at Shaquille O’Neal.

Photo Source: Lea Salonga IG